ربیعُ الاول اُمیدوں کی دنیا ساتھ لے آیا

سلام آمد ماہ رسول مقبول

      صلى الله عليه وسلم

ربیعُ الاول اُمیدوں کی دنیا ساتھ لے آیا

دعاؤں کی قَبولیَّت کو ہاتھوں ہاتھ لے آیا

خدا نے ناخُدائی کی خود انسانی سفینے کی

کہ رحمت بن کے چھائی بارہویں شب اس مہینے کی

جہاں میں جشنِ صبحِ عید کا سامان ہوتا تھا

اُدھر شیطان تنہا اپنی ناکامی پہ روتا تھا

صدا ہاتف نے دی اے ساکنانِ خِطّۂ ہستی!

ہوئی جاتی ہے پھرآباد یہ اُجڑی ہوئی بستی

فرشتوں کی سلامی دینی فوج گاتی تھی 

جناب آمنہ سنتی تھی یہ آواز آتی تھی 

مبارَکباد ہے ان کیلئے جو ظلم سہتے ہیں 

کہیں جن کو اماں ملتی نہیں بربادرہتے ہیں

مبارکباد بیواؤں کی حسرت زا نگاہوں کو

اثر بخشاگیا نالوں کو فریادوں کو آہوں کو

ضعیفوں بیکسوں آفت نصیبوں کو مبارَک ہو

یتیموں کو غلاموں کو غریبوں کو مبارک ہو

مبارَک ٹھوکریں کھا کھا کے پَیہم گرنے والوں کو

مبارَک دشتِ غُربت میں بھٹکتے پھرنے والوں کو

مبارَک ہوکہ دَورِ راحت وآرام آپہنچا

نَجاتِ دائمی کی شکل میں اسلام آپہنچا

مبارک ہوکہ ختم المرسلیں تشریف لے آئے

جناب رَحمۃُ لِّلعٰلمیں تشریف لے آئے

بَصَداندازِیکتائی بَغایَت شانِ زیبائی

امیں بن کر امانت آمِنہ کی گود میں آئی

سلام اے آمنہ کے لعل اے محبو سبحانی 

سلام اے فخر موجودات فخر نوع انسانی

مبارَک ہو مبارَک ہو مبارَک ہو مبارَک ہو 

مبارَک عید میلادالنبی کا پھر پیام آیا 

 *نعرہ* 

سرکار کی آمد مرحبا!          سردار کی آمد مرحبا!                 سالار کی آمد مرحبا!

مختار کی آمد مرحبا!            منٹھار کی آمد مرحبا!                 دلدار کی آمد مرحبا!

غمخوار کی آمد مرحبا!          تاجدار کی آمد مرحبا!                 شاندار کی آمد مرحبا!

مکی کی آمد مرحبا!

مدنی کی آمد مرحبا!

طالب دعا:- محمدفيضان رضارضوی علیمی 

جماعت‌رضائے مصطفے سیتامڑھی بہار