بغداد کے ایک عالمِ دِین نمازِ جمعہ کے بعد اپنے شاگردوں کے ساتھ فاتحہ خوانی کیلئے قبرستان گئےتو وہاں ایک سیاہ رنگ کا سانپ دیکھا توانہوں نے اسے مار ڈالا ۔کچھ دیر کے بعد گرد وغُبار اُڑی اور وہ اپنے شاگردوں کی نظروں سے اوجھل ہوگئے ۔اپنے استاد صاحب کی اچانک گمشدگی پر سارے طلبہ بڑے حیران وپریشان بیٹھے تھے ۔ کچھ دیر بعد دیکھاکہ اُستادِمحترم اعلیٰ قسم کا لباس پہنے چلے آرہے ہیں ۔ جب ان سے مُعاملہ دریافت کیا گیا تو فرمانے لگے :مجھے جنّات اُٹھاکر ایک جزیرے (Island)میں لے گئے اور مجھے دریا میں غوطہ دینے کے بعد اپنے بادشاہ کے سامنے حاضر کردیا ۔ میں نے دیکھا کہ جنّات کا بادشاہ ننگی تلوار ہاتھ میں لئے تخت پربیٹھا ہے اور اس کے سامنے ایک نوجوان کی لاش رکھی ہے جس سے خُون بہہ رہا ہے ۔ جنّات کے بادشاہ نے میرے بارے میں پوچھا تو اسے بتایا گیا کہ یہی شخص اس کا قاتل ہے ۔یہ سنتے ہی بادشاہ غضبناک ہو کر کہنے لگا اس نے تیرا کوئی نُقصان نہیں کیا پھر بھی تُو نے اس کو ناحق قتل کردیا؟ میں نے کہا: اس نوجوان کو میں نے قتل نہیں کیا آپ کے خُدّام مجھ پر اِلزام لگارہے ہیں ۔ خادموں نے کہا کہ اس کے قاتل ہونے کا ثبوت یہ ہے کہ اس شخص کا عصا خُون سے آلُودہ ہے ۔میں نے کہا یہ خون تو ایک سانپ کاہے جسے میں نے مارا تھا ۔ بادشاہ نے کہا جس سانپ کو تُو نے مارا تھا وہ میرا ہی بیٹا تھا ۔بادشاہ نے قاضی سے کہا یہ شخص قتل کا اقرار کرچکا ہے،لہٰذااس کے قتل کا حکم صادر کیجئے ۔یہ سنتے ہی قاضی نے بھی میرے قتل کا حکم جاری کردیا۔ اب جنّات کا بادشاہ تلوار لے کر مجھ پروار کرنے ہی والا تھا کہ میں نے دل ہی میں محبوبِ سبحانی حضرت سَیِّدُنا شیخ عبدالقادر جیلانی رَحْمَۃُ اللّٰہ ِتَعَالٰی عَلَیْہ کو مدد کیلئے پکارا تواسی وقت ایک نورانی چہرے والا شخص نمودار ہوا اور بادشاہ سے کہنے لگا : اس عالمِ دِین کو قتل نہیں کرو یہ سلطانُ الْاولیاء حضرت سَیِّدُنا غوثِ اعظم رَحْمَۃُ اللّٰہ ِتَعَالٰی عَلَیْہ کا مرید ہے اگر غوثِ پاک نے اس کے قتل کے بارے میں تم سے پوچھ لیا تو کیا جواب دو گے ؟جنّات کے بادشاہ نے سرکار غوثِ پاک کا نام سنتے ہی تلوار رکھ دی اور مجھ سے کہا کہ جو عزّت وتعظیم غوثِ اعظم کی میرے دل میں ہے اس کی خاطر میں نے تمہارا قصور معاف (Forgive) کیا اور اب تم اس مقتول کا جنازہ پڑھاؤ اور اس کی مغفرت کیلئے دعا کرو ۔اس کے بعد مجھے خلعت پہنا کر جنّات کے ساتھ رخصت کردیا۔(تفریح الخاطر،۱۰۳)
تھرتھراتے ہیں سبھی جنّات تیرے نام سے
ہے ترا وہ دبدبہ یا غوثِ اعظم دست گیر
(وسائلِ بخشش مُرمّم،ص۵۴۷)
0 تبصرے
اپنا کمینٹ یہاں لکھیں