یا الٰہی ہر جگہ تیری عطا کا ساتھ ہو

مناجات

از اعلیٰ حضرت امام احمد رضا قادری

یا الٰہی ہر جگہ تیری عطا کا ساتھ ہو

جب پڑے مشکل شہ مشکل کشا کا ساتھ ہو

یا الٰہی بھول جاؤں نزع کی تکلیف کو

شادی دیدار حسن مصطفیٰ کا ساتھ ہو

یا الٰہی گور تیرہ کی جب آئے سخت رات

ان کے پیارے منہ کی صبح جانفزا کا ساتھ ہو

یا الٰہی جب پڑے محشر میں شور دار و گیر

امن دینے والے پیارے پیشوا کا ساتھ ہو

یا الٰہی جب زبانیں باہر آئیں پیاس سے

صاحب کوثر شہ جود و عطا کا ساتھ ہو

یا الٰہی سرد مہری پر ہو جب خورشید حشر

سیّد بے سایہ کے ظل لِوا کا ساتھ ہو

یا الٰہی گرمی محشر سے جب بھڑکیں بدن

دامنِ محبوب کی ٹھنڈی ہوا کا ساتھ ہو

یا الٰہی نامۂ اعمال جب کھلنے لگیں

عیب پوش خلق ستار خطا کا ساتھ ہو

یا الٰہی جب بہیں آنکھیں حساب جرم میں 

ان تبسم ریز ہونٹوں کی دُعا کا ساتھ ہو

یا الٰہی جب حساب خندئہ بیجا رُلائے

چشم گریانِ شفیعِ مرتجیٰ کا ساتھ ہو

یا الٰہی رنگ لائیں جب مری بیباکیاں

ان کی نیچی نیچی نظروں کی حیا کا ساتھ ہو

یا الٰہی جب چلوں تاریک راہِ پل صراط

آفتاب ہاشمی نور الھدیٰ کا ساتھ ہو 

یا الٰہی جب سرِ شمشیر پر چلنا پڑے

ربِّ سلِّم کہنے والے غمزُدا کا ساتھ ہو

یا الٰہی جو دُعائے نیک میں تجھ سے کروں

قدسیوں کے لب سے آمیں ربّنا کا ساتھ ہو

یا الٰہی جب رضاؔ خواب گراں سے سر اُٹھائے

دولتِ بیدار عشقِ مصطفیٰ کا ساتھ ہو

ترسیل: نوری مشن/اعلیٰ حضرت ریسرچ سینٹر، مالیگاؤں

***