17 Ramazaan 2 Hijri ko Musalmano aur Quraish ke bich Junge Badr hui jis me ALLĀH ta’ala ke fazl se Musalmano ki azeem fatah mili aur 70 Kuffaar qatl hue aur 70 qaid kiye gaye.
Ka'ab bin Ashraf naami yahoodi bahot hi ameer tha. Yahoodi ulama aur mazhabi peshwao ko apne khazaane se tankhwaah deta tha. Aur shaayari me bhi ba-kamaal tha. Quraish ke maqtoolo ki ta’aziyat ke liye woh Makka gaya. Waha Badr ke maqtool ka ek purdard maraṡia sunaaya, khud bhi rone laga aur saami'een bhi rone lage. Is tarah Quraish me maatam barpa ho gaya. Phir Abu Sufyan ko lekar haram me aaya aur Kuffaare Makka ke saath Ka’aba ka gilaaf pakadkar ahad kiya ki “Musalmano se Badr ka intiqaam zaroor lenge.”
(Ka'ab bin Ashraf ko is ki gustaakhiyo ki wajah se baad me Hazrat Muhammad bin Maslama ki sardaari me muslamano ne qatl kiya.)
Is ke baad Ikrama bin Abu Jahal aur Sufyaan bin Umayya dusre kuffaare Quraish jin ke rishtedaar Junge Badr me qatl ho gaye the un sab ke saath Abu Sufyaan ke paas gae aur kaha ki “Musalmano ne hamari qaum ke Sardaaro ko qatl kar diya. Is ka badla lena hamara farz hai. Lihaaza hamari khwaahish hai ki Quraish Ki mushtarka tijaarat me is saal jitna munaafa hua hai use jama karke behtareen hathiyar khareede jaaye aur phir ek azeem fauj lekar Madeena par hamla karke Musalmano ko dunya se mita dena chaahiye.” Abu Sufyaan ne is darkhwaast ko manzoor kar liya.
Is tarah jung ke liye hathiyaar jama karke Abu Sufyaan ki sardaari me lashkare Kuffaar Makka se rawaana hua.
Huzoor sallallāhu alaihi wa sallam ke chacha Hazrate Abbaas bin Abdul Muttalib radiy-Allāhu ta’ala anhu ne Makka se khufiya paighaam bhejkar Huzoor sallallāhu alaihi wa sallam ko is baat ki khabar di.
6 Shawwaal 3 Hijri ko Huzoor sallallāhu alaihi wa sallam ne Hazrate Anas aur Hazrate Munish bin Adi bin Fuzala radiy-Allāhu ta’ala anhuma ko Quraish Ke lashkar ki khabar laane ke liye bheja. Unho ne waapas aakar bataaya ki “Abu Sufyaan ka lashkar Madeena ke bilkul qareeb aa gaya hai aur unke ghode Madeena ki chaaragaah ki tamaam ghaas khaa gae hain.”
****************
Is ke baad Huzoor sallallāhu alaihi wa sallam ne jung ki tayyaari shuru ki.
Shaher se baahar nikle to dekha ke ek fauj aa rahi hai. Jab pata chala ke Yahoodiyo ka lashkar hai to Aap ne farmaaya “In lgo ko waapas laut jaane ke liye kaho. Hum mushriko ke muqaabale me mushriko ki madad nahi lena chaahte.”
Jab yahoodiyo ka lahskar waapas chala gaya to Abdullāh bin Ubay ne kaha ki “Muhammad (sallallāhu alaihi wa sallam) ne mera mashwara qubool nahi kiya is liye main us ka saath nahi dunga.” Aur woh apne 300 saathiyo ke saath alag ho gaya.
Qabeela-e-Khazraaj me se Banu Salama aur Qabeela-e-Aws me se Banu Haariṡa ke logo ne bhi shuru me Madeena waapas lautne ka iraada kiya magar ALLĀH ta’ala ke fazl se un ke dilo me phir se Islaam ki mohabbat paida hui.
****************
Phir Huzoor sallallāhu alaihi wa sallam ne apni fauj ka muayna farmaaya aur jo log kam umr the unko waapas jaane ke liye farmaaya.
Jab Hazrat Raafe bin Khudez radiy-Allāhu ta’ala anhu se kaha gaya ki “Tum bahot chhhote ho, Tum bhi waapas chale jaao.” to foran angotho ke bal tankar khade ho gae taake unka qad ooncha nazar aaye. Unki yeh tarkeeb kaam kar gai aur un ko fauz me shaamil kar liye gae.
Hazrate Sumra radiy-Allāhu ta’ala anhu ko waapas jaane ke liye farmaaya to unho ne arz kiya ki “Main Raafe bin Khudez ko kushti me pachhaad leta hu. Isi liye agar woh fauj me liye gae to mujhe bhi jung me shareek hone ki ijaazat milni chaahiye.”
Chunaanche dono ka muqaabala karaaya gaya aur waaqai Hazrate Sumra radiy-Allāhu ta’ala anhu ne Hazrate Raafe bin Khudez ko pachhaad diya.
Is tarah dono nau-jawaano ko Jung me shirkat ki sa’adat haasil ho gai.
**************
Quraish ne 12 Shawwaal 3 Hijri Budh ke roz Madeena ke qareeb pahunchkar Jabale Uhad par apna padaaw daala.
Hazrat Abdullāh ibn Umme Maktum radiy-Allāhu ta’ala anhu ko naa'ib banakar Huzoor sallallāhu alaihi wa sallam lashkar ke saath 14 Shawwaal 3 Hijri ko baad namaaze Jum'aa Madeena se rawaana hue. Raat ko Bani Najjaar me thehre aur 15 radiy-Allāhu ta’ala anhu ne azaan di aur sab ne namaaze Fajr ada ki.
Phir Aap ne lashkar me saf-bandi shuru ki. Muslim lashkar me 700 Sahaaba the, jin me 100 Jirah-posh the aur 4 sawaar the.
Quraish ke lashkar me 3000 log the jin me 700 Jirah-posh the aur 200 sawaar the 15 Aurten bhi saath me thi.
Quraish ne lashkar ke Khaalid in Waleed ko Maymana par, Ikraama bin Abu Jahal ko Maysara par aur Abu Sufyaan ko Qalbe lashkar par muqarrar kiya, Safwaan bin Umayya ko Sawaaro ka daste ka sardaar banaaya aur Abdullāh bin Rabeea ko Teerandaazo ka sardaar banaaya aur Talha bin Abu Talha (jo Qabeela-e-Abdud Daar se tha) ko Alam bardaar banayaa.
Huzoor Rasool-Allāh sallallāhu alaihi wa sallam ne Hazrate Mus'ab bin Umair radiy-Allāhu ta’ala anhu ko Alam bardaar banaaya. Hazrate Ukaasha ibn Muhsin Asadi radiy-Allāhu ta’ala anhu ko Maymana (daayen baazu) par, Hazrate Abu Salama ibn Asad Makhzumi ko Maysara (baayen baazu) par aur Hazrate Ubaida bin Zarrar aur Hazrate Miqdaad bin Aswad radiy-Allāhu ta’ala anhuma ko Mu'akhkhara (pichhle hisse) par muqarrar farmaaya.
Jable Uhad ko pusht par rakha, Jable Rumah [Jable Ainain] (Jo Waadi e Kanat me hai) ko apni baayi taraf rakha. Pahaad me ek raasta tha jis se guzarkar Kuffaare Quraish Musalmamo par hamla aawar na ho is liye Huzoor Rasool-Allāh sallallāhu alaihi wa sallam ne Hazrat Abdullāh bin Jubair bin Nomaan radiy-Allāhu ta’ala anhu ki sardaari me taqreeban 50 tirandaaj ashaaba ko Jabale Rumah par theharkar nigraani karne ke liye farmaaya aur farmaaya ke “Haalaat kaise bhi ho chaahe fatah mile ya nakaami, jab tak mera hukm na ho tum log yaha se hatna nahi.”
Shuruat me Quraish ki aurten Badr ke maqqtoolo ke maatam se bhare hue Ash'aar gaane lagi. Phir Abu Sufyaan ki biwi Hinda ki sardaari me sab aurte aise ash'aar gaane lagi :
“Hum aasmaan ke sitaaro ki betiya hain, Hum qaaleeno par chalne waaliya hain.
Agar tum aage badhkar ladoge to hum tum se gale milenge aur agar qadam pichhe hataaya to hum tum se alag ho jaayenge.”
*********************
Sab se pehle Abu Aamir Raahib al-Awsi aage aaya, jo bahot neki kiya karta tha aur Madeena se Makka chala gaya tha. Us ne kaha “Kya tum log mujhe pehchaante ho? Main Abu Aamir Raahib hu.” Ansaar ne kaha “Aye Faasiq! Hum Tujhe khoob pehchaante hain. Khuda tujhe zaleel farmae.” Yeh sunkar Abu Aamir tilmila utha. Us ke saathi teer barsaane lage. Jawaab me Ansaar ne aisi zor se sang-baari ki ke Abu Aamir aur us ke saathi pichhe hat gae.
Phir Talha bin Abu Talha saf se nikalkar maidaan me aaya aur kehne laga “Tum me koi aisa hai jo mujhe dozakh me pahuncha de?” Is ka yeh ghamand bhara kalaam sunkar Hazrat Maula Ali radiy-Allāhu ta’ala anhu aage aaye aur Zulfiqaar ke ek waar se uska sar phaad diya aur woh zameen par tadapne laga. Hazrat Ali apna munh pherkar waha se hat gae.
Kisi ne puchha ki “Aap ne uska sar kyun nahi kaat liya?” Hazrat Ali ne farmaaya ki “Jab woh zameen par gira to uski sharmgaah khul gai. Use is haal me dekh kar mujhe haya aa gai aur maine munh pher liya.”
Us ke baad uska bhai Uṡmaan bin Abu Talha yeh sher padhta hua aage aaya “Alambardaar ka farz hai ki neze ko khoon me rang de ya woh takrakar toot jaaye.” Hazrate Hamza radiy-Allāhu ta’ala anhu uske muqaabale ke liye aaye aur talwaar se uske shaane par aisa waar kiya ke talwar reedh ki haddi ko kaatti hui kamar tak pahunch gai aur Hazrate Hamza ne yeh naara lagaaya “Main haajiyo ko sairaab karne waale Abdul Muttalib ka beta hu.”
Iske baad Munafa bin Abu Talha ne aur us ke qatl hone ke baad Haariṡ ne alam uthaaya.
Iske baad aam Jung shuru hui.
Huzoor akram sallallāhu alaihi wa sallam ke daste mubarak me ek talwaar thi jis me ek Sher likha hua tha : “Tarjuma : Buzdili me sharmindagi hai aur aage badhkar ladne me izzat hai, Aur buzdil hokar aaadmi takdeer se nahi bach sakta.”
Huzoor sallallāhu alaihi wa sallam ne farmaaya ki “Kaun hai jo is talwaar ko lekar is ka haq ada kare?” Yeh sunkar bahot se sahaaba aage aaye. Magar Huzoor sallallāhu alaihi wa sallam ne woh talwaar Hazrate Abu Dujaana Simak bin Kharasha radiy-Allāhu ta’ala anhu ko ata farmai. Hazrate Abu Duzaana ne arz kiya “Ya Rasool-Allāh sallallāhu alaihi wa sallam! Is talwaar ka haq kya hai?” Huzoor sallallāhu alaihi wa sallam ne farmaaya “Tum is se kaafiro ko qatl karo yaha tak ke yeh tedhi ho jaaye.” Unho ne kaha “Main is talwaar ko iske haq ke saath leta hu.”
Hazrate Abu Dujaana apne sar par surkh rumaal baandh kar josh o masharrat ke saath maidaane jung me pahunche aur talawaar chalaate hue dushmano ki safo ko cheerte hue aage badh rahe the ki achaanak unke saamne Abu Sufyaan ki biwi Hinda aa gai. Hazrate Abu Dujaana ne yeh sochkar talwaar ko rok liya ke Huzoore Aqdas sallallāhu alaihi wa sallam ki muqaddas talwaar ke liye yeh zeb nahi deta hai ki woh kisi aurat ka sar kaate.
Hazrate Hamza radiy-Allāhu ta’ala anhu intihai josh ke saath talwaar lekar aage badhe aur dushamno ko qatl karna shuru kiya. Shiba Ghanbashani saamne aaya to Hazrate Hamza ne kaha “Tu Allah ke Rasool se jung karne chala hai. Ab is ka anjaam dekh le.” Yeh kehkar us par talwaar chala di aur woh do tukde hokar zameen par dher ho gaya.
Hazrate Hanzala bin Abi Aamir al-Awsi radiy-Allāhu ta’ala anhu ke Huzoore Aqdas sallallāhu alaihi wa sallam se ijaazat talab karke aage badhe. Aur apne baap Abu Aamir ko qatl karne ke liye intihai josh aur jaan-baazi ke saath ladte hue qalbe lashkar tak pahunch gae. Kuffaar ke sipaah saalaar Abu Sufyaan ko dekhkar hamla kar diya lekin achaanak Shaddaad bin Aswad ne jhapat kar pichhe se waar roka aur Hazrate Hanzala ko shaheed kar diya.
Hazrat Amr bin Jamuh al-Khazraji radiy-Allāhu ta’ala anhu pair se m’aazoor the, phir bhi israar karke Jung shareek hue aur bahaaduri se ladte hue shaheed hue.
Quraish apna alam neeche girne nahi dete the. Haariṡ ke baad Abdullāh bin Jamila, us ke baad Azeez bin Uṡmaan ne aur us ke qatl hone ke baad Suwab ne alam uthaaya. Jab us ke dono haath kat gaye aur neeche gir pada to jhande ko apne seene se daba liya.
Lekin Hazrat Ali, Hamza, Abu Dujaana, Sa’aad bin Abi Waqqaas aur deegar sahaaba ne aisi dileri se hamle kiye ke kuffaar maidaane jung chhodkar bhaagne lage.
****************
Yeh dekhkar pahaadi par nigraani ke liye thehre hue ashaaba ne socha ke ab to musalmano ko fatah milne waali hai. Is liye hume bhi neeche aa jaana chaahiye. Hazrat Abdullāh bin Jubair bin Nomaan radiy-Allāhu ta’ala anhu ne unhe bahot roka aur kaha “Jab tak Huzoor Rasool-Allāh sallallāhu alaihi wa sallam ka hukm na ho hume neeche nahi jaana chaahiye.” Magar wo nahi maane aur pahaadi par se neeche aa gaye.
Kaafiro ke sardaar Khaalid bin Waleed ne jab mauqa dekha to apne ghud-sawaar saathiyo ke saath musalmano par pahaad ke bich ke raaste se peeche se hamla kiya. Hazrat Abdullāh bin Jubair ne chand jaan nisaar sahaaba ke saath Quraish ka muqaabala kiya lekin sab shaheed ho gaye.
Is ke baad haalaat palat gaye. Amrah binte al-Qama ne alam ko uthaaya aur Quraish ki fauj ki ghairat aur hosla waapas aaya. Khaalid bin Waleed ko musalmano par pichhe se hamla karte hue dekhkar Abdullāh ibne Qamiya ki sardaari me Quraish ki fauj ne palatkar aisa hamla kiya ke Musalmano ko apni hifaazat ke liye bhaagna pada.
Is bhaag daud me Hazrate Huzaifa radiy-Allāhu ta’ala anhu ke waalid Hazrate Al-Yamaan radiy-Allāhu ta’ala anhu galti se Musalman ki talwaar se shaheed hue.
Hazrat Mus'ab ibn Umair radiy-Allāhu ta’ala anhu ne buland aawaaz se Takbeer kehna shuru kiya taake Quraish ka dhyaan hat jaaye aur wo Huzoor Rasool-Allāh sallallāhu alaihi wa sallam par hamla na kare. Abdullāh ibne Qamiya ne un par hamla kiya. Talwaar ke waar se un ka daahina haath kat gaya. Unho ne islaami jhande ko baaye haath se sambhal liya. Ibne Qamiya ne talwaar se waar karke un ke baaye haath ko bhi alag kar diya. Unho ne dono kate hue baazuo se Parcham e Islaam ko apne seene se laga liya. Aur Qur'ān majeed ki aayat tilaawat karne lage “Muhammad (sallallāhu alaihi wa sallam) rasool hi hain, aap se pehle bhi kai rasool guzar chuke hain.” (Soorah Aale Imraan, Aayat 144). Ibne Qamiya ne neza phenka aur Mus'ab ibn Umair ko shaheed kar diya.
Hazrate Mus'ab bin Umair ki surat Huzoor sallallāhu alaihi wa sallam se kuchh mushaabeh thi. Unki shaheed hote dekhkar Kuffaar ne shor o gul shuru kar diya ki Mohammad (sallallāhu alaihi wa sallam) qatl ho gaye (ma’az Allāh).
Yeh sunkar musalmano me bad-hawaasi chhaa gai. Kuchh sahaaba Madeena ki taraf bhaagne lage, kuchh seham kar jaha the wahi par baith gaye aur kuchh jaan-nisaari ke saath ladte rahe.
Hazrate Anas bin Nazar al-Khazraji radiy-Allāhu ta’ala anhu josh ke saath jaa rahe the. Hazrat Sa'aad bin Ma'aaz radiy-Allāhu ta’ala anhu ne unhe puchha “Kaha jaa rahe ho?” Unho ne kaha “Khuda ki qasam! Uhad ke pahaad se jannat ki khushboo aa rahi hai.” Chand sahaaba baithe hue the. Un se kaha “Agar Rasool-Allāh sallallāhu alaihi wa sallam shaheed ho gaye hain to un ke deen ki khaatir jihaad karke apni wafa aur jaan-baazi ka ṡaboot do.” Yeh kehkar talwaar lekar Kuffaar ke lashkar me ghus gaye aur jaan-baazi ke saath ladte hue shaheed ho gaye. Un ki laash par 80 se zyada zakhm the aur kaafiro ne un ke naak, kaan bhi kaat daale the. Un ki bahen ne un ki ungliya dekhkar pehchaana.
Hazrate Ṡaabit bin Waqsa al-Awsi radiy-Allāhu ta’ala anhu ne Ansaar sahaaba ko josh dilate hue kaha “Apni wafa ka ṡaboot do aur ALLĀH ke deen ki khaatir kuffaar ka muqaabala karo.” Aur Kuffaar ke lashkar par hamla kiya aur jaan-baazi ke saath ladte hue shaheed ho gaye.
****************
Phir Hazrate Ka’ab bin Maalik radiy-Allāhu ta’ala anhu ne sab se pehle Huzoor sallallāhu alaihi wa sallam dekha aur pukaara “Aye musalmano! Rasool-Allāh sallallāhu alaihi wa sallam yaha hain.” Yeh sunkar musalman phir se josh aa gaya aur us maqaam par pahunchne lage. Kuffaar bhi Huzoor sallallāhu alaihi wa sallam par hamla karne ke liye tezi se jama hone lage.
Hazrate Umme Ammaara Nusayba binte Ka’ab radiy-Allāhu ta’ala anha apne shohar Hazrate Zaid Bin Aasim aur do bete Hazrate Ammaara aur Hazrate Abdullāh radiy-Allāhu ta’ala anhuma ke saath aai thi. Pehle to Mujaahideen ko paani pilati thi. Lekin jab dekha ke Kuffaar ne Huzoor sallallāhu alaihi wa sallam par to mashk phenk kar ek khanzar lekar Kuffaar ke muqaable me khadi ho gai aur Kuffaar ke teer wa talwaar ke waar ko rokti rahi. Chunaanche unke sar par aur gardan par 13 zakhm hue.
Ibne Qamiya ne jab Huzoor sallallāhu alaihi wa sallam par talwaar se hamla kiya to Umme Ammaara ne aage badhkar roka. Chunaanche unke kandhe par gehra zakhm ho gaya. Phir aage badhkar Ibne Qamiyya ke shaane par zordaar talwaar maari lekin woh mal'oon dohari zirah pehne hue tha isi liye bach gaya.
Un ke bete Hazrate Abdullāh ko Kaafir ne zakhmi kar diya aur zakhm se khoon band nahi ho raha tha. Aap ne foran kapda phaadkar zakhm par baandh diya aur kaha “Beta! Utho, Khade ho jaao aur phir jihaad me mashgool ho jaao.”
Ittifaaq se woh Kaafir Huzoor sallallāhu alaihi wa sallam ke saamne aa gaya to Aap ne farmaaya “Aye Umme Ammaara! Dekh , Isi ne tere bete ko zakhmi kiya hai.” Yeh sunkar Hazrate Umme Ammaara ne jhapatkar us kaafir ke pair par talwaar ka waar kiya. Woh Kaafir gir pada aur sureen ke bal ghasitta hua bhaaga. Yeh manzar dekhkar Huzoor sallallāhu alaihi wa sallam ne muskurakar farmaaya “Aye Umme Ammaara! Tu Khuda ka shukr ada kar ki usne tujhe itni taaqat ata farmai ki tune Khuda ki raah me jihaad kiya.” Hazrate Umme Ammaara ne arz kiya Ki Yaa Rasoo-Allāh sallallāhu alaihi wa sallam! Dua farmaaiye ki hum logo ko jannat me aapki khidmat guzaari ka sharf haasil ho.” Usi Waqt Huzoor sallallāhu alaihi wa sallam ne unke liye aur unke Shohar aur Beto ke liye dua farmai “Aye ALLĀH in sab ko jannat me mera rafeeq bana.”
Hazrate Talha bin Ubaidullāh aur Hazrate Sa’ad bin Abi Waqqaas radiy-Allāhu ta’ala anhuma ne 7 ansaar ashaaba ke saath halqambanakar bahot bahaaduri se kaafiro ka muqaabala kiya aur Huzoor Rasool-Allāh sallallāhu alaihi wa sallam ki hifaazat ki.
Huzoor sallallāhu alaihi wa sallam ki hifazat karte hue Hazrat Umarah bin Ziyad bin Sakan al-Awsi radiy-Allāhu ta’ala anhu ke seene me ek kaafir ka teer laga. Woh ladkhadakar girne lage to dua karne lage “Ya Ilāhi! Maut se pehle mujhe apne Mehboob sallallāhu alaihi wa sallam ki ziyarat kar lene de.”
Zameen par girte hi Huzoor sallallāhu alaihi wa sallam ki talaash shuru ki. Jab dekha ki Huzoor sallallāhu alaihi wa sallam thodi door tashreef farma hain to aap khud ko zameen par ghasitte hue aahista aahista Huzoor sallallahu alaihi wa sallam tak pahunch gaye. Phir apna moonh Huzoor sallallāhu alaihi wa sallam ke qadmo par rakh diya aur apne rookhsaar Huzoor sallallāhu alaihi wa sallam ke talwo par malte jaate aur yeh kehte jaate the “Rabbe Ka’aba ki qasam, Main apni muraad ko pahunch gaya.” Phir Huzoor sallallāhu alaihi wa sallam ke qadmo me hi jaam e shahaadat nosh farmaaya.
Ek ke baad ek sab sahaaba shaheed ho gaye tab Hazrat Talha bin Ubaidullāh ne kuffaar ka saamna kiya aur apne haatho se un ke waar ko roke aur un ka muqaabala karke baar baar unhe door bhagaaya aur Huzoor Rasool-Allāh sallallāhu alaihi wa sallam ki hifaazat ki.
Hazrate Sa’aad bin Abi Waqqas radiy-Allāhu ta’ala anhu teerandaazi me maahir the aur jaldi jaldi teer chala rahe the. Huzoor Rasool-Allāh sallallāhu alaihi wa sallam apne daste mubarak se teer utha utha kar unko dete aur farmate the “Aye Sa’aad! Teer barsaate jaao, Tum par mere maa baap qurbaan.”
Baad me Hazrate Hamza, Hazrate Abu Dujaana Simak bin Kharasha, Hazrat Ali ibn Abu Taalib, Hazrat Abu Bakr Siddeeq, Hazrat Umar Faarooq, Hazrate Abu Ubaida Aamir ibn Jarrah, Hazrat Abdur Rahmān bin Awf, Hazrate Zubair ibn Awwaam, Hazrate Abu Talha, Hazrate Miqdaad ibn Aswad, Hazrate Sahl bin Hunaif, Hazrat Asim bin Ṡaabit, Hazrate Malik bin Sinaan, Hazrate Hateeb bin Abu Balta'a, Hazrate Qataadah bin Noamaan Ansaari aur deegar ashaaba radiy-Allāhu ta’ala anhuma bhi madad ke liye pahunche.
Jab Hazrat Abu Bakr Siddeeq aur Hazrat Abu Ubaida bin Jarrah radiy-Allāhu ta’ala anhuma aaye to Huzoor Rasool-Allāh sallallāhu alaihi wa sallam ne unhe Hazrat Talha bin Ubaidullāh radiy-Allāhu ta’ala anhu ki khabar lene ke liye farmaaya. Huzoor Rasool-Allāh sallallāhu alaihi wa sallam ki hifazat karte hue Hazrat Talha bin Ubaidullāh ke jism par 70 se zyada chhote bade zakhm the aur un ki ungliya bhi kat chuki thi aur un ka haath maflooj (paralysed) ho gaya tha.
Hazrate Hamza ibn Abdul Muttalib radiy-Allāhu ta’ala anhu dono haath me talwaar ke saath bahot bahaaduri se kaafiro ka muqaabala karte rahe aur unhe aage aane se roka. Aap ne 31 kaafiro ko waasile jahannam kiya.
Jubair ibn Mut'im ne apne chacha Tuwayma ibn Adiy ki maut ka badla lene ke liye Wahshi ibn Harb naam ke ghulaam ko tayyaar kiya tha. Us ghulaam ne barchhi phenkar Hazrate Hamza ko shaheed kar diya. Aur Abu Sufyaan ki biwi Hind bint Utbah ne apne baap ki maut ka badla lene ke liye un ke naak, kaan kaate aur un ka kaleja nikaalkar chabaaya.
Hazrate Abdullāh ibne Jahsh bahot bahaaduri se dushmano ka muqaabala karte rahe lekin Akhnas ibn Shurayq al- Ṡaqafi ne unko shaheed kar diya aur kuffaar ne un ke naak, kaan bhi kaat dale.
Hazrate Abu Dujaana Simak bin Kharasha radiy-Allāhu ta’ala anhu jhukkar Huzoor Rasool-Allāh sallallāhu alaihi wa sallam ke liye dhaal ban gae aur talwaar aur nezo ke waar ko apni pusht par lete rahe aur Aap tak koi waar pahunchne nahi diya. Abdullāh bin Haamid ne Huzoor sallallāhu alaihi wa sallam par hamla kiya to Hazrate Abu Dujaana ne use qatl kar diya.
Hazrat Ali radiy-Allāhu ta’ala anhu ne bahot hi jaan-baazi aur bahaaduri ke saath dushmano ka muqaabala karke Huzoor Rasool-Allāh sallallāhu alaihi wa sallam ki hifazat ki. Unho ne 8 kuffaar ko qatl kiya.
Hazrate Abu Talha radiy-Allāhu ta’ala anhu tirandaazi me maahir the. Unho ne is qadar teer barsae ke kai kamaane toot gai. Woh Huzoor sallallāhu alaihi wa sallam ko tee aur talwaar ke waar se bachaane ke liye aage khade ho gaye. Kabhi kabhi Aap dushmano ki fauj ko dekhne ke liye gardan uthaate to Hazrate Abu Talha arz karte ki “Ya Rasool-Allāh sallallāhu alaihi wa sallam! Mere maa-baap aap par qurbaan, Aap gardan na uthae aur meri peeth ke pichhe hi rahe, Mera seena aapke liye dhaal hai.”
Hazrate Qatadah bin Noamaan Ansaari radiy-Allāhu ta’ala anhu ne apna chehra Huzoor sallallāhu alaihi wa sallam ke sar ke saamne rakh diya. Achaanak kaafiro ka ek teer unki aankh par laga aur aankh nikalkar unke rukhsaar par aa gai. Huzoor sallallāhu alaihi wa sallam ne apne daste mubarak se unki aankh ko uthakar aankh ke halke me rakh diya aur dua farmai “Ya ALLĀH! Qatadah ki aankh bacha le jisne tere Rasool ke chehre ko bachaaya.” Mash'hoor hai ki unki woh aankh dusri aankh se zyada roshan aur khubsurat ho gai.
Huzoor sallallāhu alaihi wa sallam ne Hazrate Zaid bin Ṡaabit radiy-Allāhu ta’ala anhu ko Hazrate Sa’aad bin Rabee al-Khzraji radiy-Allāhu ta’ala anhu ki khabar lene ke liye bheja. Hazrate Zaid bin Ṡaabit waha pahunche to Hazrate Sa’aad bin Rabee al-Khazraji sakraat me the. Unho ne kaha “Mere Aaqa aur Maula se kehna ke mujhe jannat ki khusboo aa rahi hai. Ansaar se kehna ki jab tak tumhara ek bhi fard dunya me baaqi ho tab tak Sarkaar e Madeena ko koi takleef nahi pahunchni chaahiye. Mere rishtedaaro se kehna ki main un tamaam ko Huzoor sallallāhu alaihi wa sallam ke saath wafa ki taaqeed karta hu.” Aur yeh kehkar intiqaal farmaaya.
Abdullāh ibne Qamiya ne Huzoor sallallāhu alaihi wa sallam par talwaar se waar kiya to Huzoor sallallāhu alaihi wa sallam ke rukhsaar mubarak khaud (helmet) ki kadiyan paivast hone se zakhmi ho gaye. Hazrate Abu Ubaida Aamir ibn Jarrah ap ke paas pahunche aur foran un kadiyo ko apne daanto se nikaalne lage. Un kadiyo ko nikaalne me un ke agle 2 daant toot gaye.
Hazrate Abu Saeed Khudri radiy-Allāhu ta’ala anhu ke waalid Hazrate Malik bin Sinaan radiy-Allāhu ta’ala anhu ne Aapke chehra-e-anwar se jo khoon baha use chuskar pee liya aur ek qatra bhi zameen par girne nahi diya. Huzoor sallallāhu alaihi wa sallam ne farmaaya “Aye Malik bin Sinaan! Tum mera khoon pee gaye?” Arz kiya “Jee haan.” Huzoor sallallāhu alaihi wa sallam ne irshaad farmaaya “Jisne mera khoon pee liya use jahannam nahi chhoo sakegi.”
Utbah bin Abi Waqqaas ne Huzoor Rasool-Allāh sallallāhu alaihi wa sallam par patthar phenka jis se Aap ke 2 dandaane mubarak shaheed ho gaye aur neeche ka honth mubarak zakhmi ho gaya.
Isi haalat me Ubay bin Khalaf ne apne ghode Ood par sawaar hokar Huzoor Rasool-Allāh sallallāhu alaihi wa sallam par hamla karne ke liye aage badha. Aap ne Hazrate Harees bin Simma radiy-Allāhu ta’ala anhu ka chhota sa neza lekar Ubay bin Khalaf ki gardan par maara. Us ki gardan par bahot maamuli zakhm aaya, lekin na-Qabeele bardaasht dard hone laga aur woh tilmila kar bhaag gaya. Baad me waapas lautte waqt maqaame Sarif par woh mar gaya.
Abdullāh bin Shahib ne Huzoor sallallāhu alaihi wa sallam par hamla karke Aap ki peshaani ko jakhmi kar diya.
****************
Phir Huzoor sallallāhu alaihi wa sallam apne jaan-nisaar sahaaba ke saath pahaad par chadh gaye, jaha Kuffaar ke liye pahunchna dushwaar tha. Abu Sufyaan ne dekh liya to apne saathiyo ke saath pahaad par chadhne laga lekin Hazrate Umar radiy-Allāhu ta’ala anhu aur dusre sahaaba ne Kaafiro par itne zor se patthar barsae ki Abu Sufyaan uski taab na laa saka aur pahaad se utar gaya.
Abu Sufyan maidaane jung se waapas jaane laga to ek pahaadi par chadhkar zor zor se pukaara “Kya yaha Muhammad (sallallāhu alaihi wa sallam) hai.” Huzoor sallallāhu alaihi wa sallam ne farmaaya “Tum log use jawaab na do.” Phir usne pukaara “Kya tum me Abu Bakr hai?” Huzoor sallallāhu alaihi wa sallam ne farmaaya “Koi kuchh jawaab nahi dega.” Phir usne pukaara “Kya tum me Umar ibn Khattaab hai?” Kisi ne jawaab nahi diya. Abu Sufyaan ghamand se kehne laga “Ye sab maare gae kyun ki agar zinda hote to zaroor jawaab dete.” Yeh sunkar Hazrate Umar radiy-Allāhu ta’ala anhu se zabt na ho saka aur chilla kar kaha ki “Aye dushmane Khuda! Tu jhuta hai, Hum sab zinda hai.”
Phir Abu Sufyaan ne yeh naara lagaaya “Aye Hubal! Tera sar bulnad ho.” Huzoor sallallāhu alaihi wa sallam ne farmaaya “Tum log iske jawaab me naara lagaao ki ALLĀH sab se bada aur buland martabe waala hai.” Abu Sufyaan ne kaha “Hamare liye Uzza aur dusre bahot saare hain aur tumhare liye koi nahi.” Huzoor sallallāhu alaihi wa sallam ne farmaaya “Tum log iske jawaab me kaho ki : ALLĀH hamara madadgaar hai aur tumhara koi madadgaar nahi.” Abu Sufyaan ne fakhr ke saath buland aawaaz kaha “Ladai me kabhi fateh kabhi shikast hoti hai. Aaj ki jung Badr ke din ka badla hai. Humare logo ne tumhare maqtoolo ke kaan, naak kaat kar unki surte bigaad di, Maine na to iska hukm diya tha na is par mujhe koi ranj ya afsos hai.” Phir us ne kaha “Hum log agle saal maidaane jung me phir se milenge.” Yeh kehkar Abu Sufyaan apne saathiyo ke saath chala gaya.
****************
Ek Ansaari aurat ke Shohar, Baap aur Bhai jung me Shaheed ho gaye the. Teeno ki shahaadat ki khabar baari baari se logo ne use di. Lekin har baar woh yehi puchhti rahi ki “Huzoor Rasool-Allāh sallallāhu alaihi wa sallam kaise hain?”
Jab logo ne use bataaya ki “Alhamdulillāh, Huzoor sallallāhu alaihi wa sallam salaamat hain.” to uski zabaan se yeh sher nikla “Tasalli hai panaahe be-qasa zinda salaamat hain, Ab koi parwah nahi saara jahaan zinda salaamat hai.”
****************
Junge Uhad me 70 Sahaaba e kiraam shaheed hue, Jin me 4 Muhaajir Hazrate Hamza ibne Abdul Muttalib, Abdullāh ibne Jahsh, Mus'ab ibne Umair aur Haariṡ ibne Uqbah bin Qaabus radiy-Allāhu ta’ala anhuma) aur 66 Ansaar the aur 30 Kuffaar qatl hue.
Jung ke baad Hazrat Amr bin Jamuh al-Khazraji radiy-Allāhu ta’ala anhu ki biwi Hind ne un ki aur apne bete Hazrat Khallaad bin Amr ki aur apne bhai Abdullāh ibn Amr ibn Hazm ki laash Madeena munawwara ki taraf le jaane ke liye ek oont par rakhi. Lekin oont aage nahi jaa raha tha. Huzoor sallallāhu alaihi wa sallam ne Hazrate Hind se puchha “Amr bin Jamuh ne ghar se nikalte waqt kya kaha tha?” Hind ne kaha “Ghar se nikalte waqt unho ne yeh dua ki thi ki Yaa ALLĀH Mujhe maidaane jung se apne ahl o ayaal me waapas aana naseeb mat karna.” Aap ne irshaad farmaaya “Yehi wajah hai ke oont Madeena ki taraf nahi chal raha hai.”
Hazrate Hanzala radiy-Allāhu ta’ala anhu ke baare me Huzoor sallallāhu alaihi wa sallam ne farmaaya ki “Farishten Hanzala ko ghusl de rahe hain.” Jab unki biwi se daryaaft kiya gaya to unho ne kaha ki “Jung ki raat ko woh apni biwi ke saath soye hue the, ghusl ki haajat thi. Magar daawat e jung ki aawaz unke kaano mein padi to usi haalat me shareek ho gaye.” Yeh sunkar Huzoor sallallāhu alaihi wa sallam ne farmaaya ki “Yehi wajah hai ke farishto ne Hanzala ko ghusl diya.” Chunaanche Hazrate Hanzala radiy-Allāhu ta’ala anhu ko ‘Ghaseel-ul-Malaa'ika’ ke laqab se yaad kiya jaata hai.
Huzoor Rasool-Allāh sallallāhu alaihi wa sallam ne apne chacha Hazrate Hamza ki laash ko talaash karke pehchana aur Aap ki aankho me aansoo aa gaye. Aur Hazrate Hamza ko ‘Sayyed-ush-Shohada’ aur ‘Asad-ur-Rasool’ ke alqaab ata farmaaye ya’ani ‘Tamaam shohada ke Sardaar’ aur ‘Rasool-Allāh ka Sher’.
Huzoor Rasool-Allāh sallallāhu alaihi wa sallam jab Hazrate Mus'ab ibne Umair ki laash ke qareeb khade rahe to aapke nooraani chehre ko dekhkar yeh Aayat tilaawat farmai “Mo’mino me aise bhi hain jinho ne ahad ko pura kiya jo unho ne apne khuda se kiya tha.” (Soorah al-Ahzaab, Aayat 23). Phir farmaaya “Maine tumhe Makka me dekha tha jaha tum se zyada khubsurat aur khush-libaas koi na tha. Aaj tumahre chehre par gard lagi hai, baal uljhe hue hain. Main ALLĀH ka Rasool gawaahi deta hu ki Qayaamat ke roz tum shohada ki qurbaani ALLĀH ta’ala ke baargaah me maqbool hogi.”
Hazrate Mus'ab ibne Umair ko jab kafan diya gaya to sirf ek chaadar thi jis se agar sar dhanka jaaye to pair khule rehte the aur agar pair dhanke jaaye to sar khula rehta tha. Aakhirkaar aap ke sar ko dhanka gaya aur pairo par azkir [ghaas] daali gai.
Shohada e Uhad ko Jabale Uhad par dafn kiya gaya aur chand shohada ko Jannatul Baqi me dafn kiya gaya.
2-2 Shohada ek saath qabr me dafnae gaye. Jis ko Qur'ān zyada yaad hota usko aage rakhte. Hazrate Hamza aur Hazrate Abdullāh ibne Jahsh ko ek qabr me rakha gaya.
**********
ALLĀH ta’ala ne in shohada ki azmat wa shaan zaahir karne ke liye yeh aayat naazil farmai :
“Aur jo log ALLĀH ki raah me qatl kiye jaayen unhe hargiz murda khayaal na karo, Balke wo apne Rab ke huzoor zinda hain unhe rizq [jannat ki ne'amnaten] diya jaata hai.”
(3 Soorah Aale Imraan, Aayat 169)
**********
Ibne Qamiya mal'oon jis ne Huzoor sallallāhu alaihi wa sallam ke chehra-e-anwar par talwaar chalai thi us par ALLĀH ta’ala ne ek pahaadi Bakre ko musallat farma diya aur us bakre ne usko sing maar maar kar chhalni kar diya aur pahaad ki bulandi se neeche gira diya aur uski laash tukde tukde hokar zameen par bikhar gai.
**********
Huzoor Rasool-Allāh sallallāhu alaihi wa sallam har saal Shohada e Uhad ki mazaar par tashreef le jaate aur waha farmate “Tum par salaam ho kyun ki tum ne sabr kiya. Tumhara akhirat ka ghar kaisa achha hai.”
Isi tarah Ameer-ul-mo’mineen Hazrat Abu Bakr Siddeeq, Hazrat Umar Faarooq, Hazrat Uṡmaan Ghani aur Hazrat Ali radiy-Allāhu ta’ala anhuma bhi har saal Shohada e Uhad ke mazaar e mubarak ki ziyarat karte the.
Huzoor Rasool-Allāh sallallāhu alaihi wa sallam ne irshaad farmaaya “Shohada e Uhad ke mazaar par jaakar Salaam pesh kiya karo ke jo bhi aisa karega Qayaamat tak un ke Salaam ka jawaab paayega.”
***************
Ashaaba radiy-Allāhu ta’ala anhuma ne ALLĀH ta’ala ki raza ke liye Ishqe Rasool ke saath Islaam ki hifaazat ke liye apne jaan o maal ki qurbaani di hai.
Is ka natija hai ke ALLĀH ke karam se aaj musalmano ko Islaam ki hifaazat ke liye jung ke maidaan me jaakar apni jaan ki qurbaani nahi deni padti.
Magar hume chaahiye ke Islaam ki shaan ko buland rakhne ke liye asl jihaad jaari rakhen ya’ani apne nafs ka muqaabala karke khwaahishaat par qaaboo rakhen aur gunaaho se bachne ki aur nek amal karne ki koshish karen aur sahi ilm e deen sikhen aur us par khud bhi amal karen aur dusro ko bhi sikhayen.
Aur hamesha sahi aqeede ke saath sahi amal karen taake sab ko pata chale ke Islaam aur musalman sahi aur behtareen hain.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur Shohada e Uhad aur sahaaba ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.
0 تبصرے
اپنا کمینٹ یہاں لکھیں